రోహిత్ శర్మ గ్యారేజీలోకి కొత్త కారు.. నంబర్ ప్లేట్ వెనుక స్పెషల్ సీక్రెట్

టీమిండియా వన్డే కెప్టెన్, హిట్‍మ్యాన్ రోహిత్ శర్మ కార్ల కలెక్షన్‌లో మరో కొత్త లగ్జరీ కారు చేరింది. ఇటీవల ముంబైలో ఎరుపు రంగు లంబోర్ఘిని ఉరుస్ ఎస్ఈ మోడల్‌ను ఆయన కొనుగోలు చేశాడు. అయితే, అందరి దృష్టినీ ఆకర్షిస్తున్న విషయం కారు కాదు, దాని ఫ్యాన్సీ నంబర్ ప్లేట్. ఆ నంబర్ వెనుక రోహిత్ కుటుంబానికి, క్రికెట్‌కు ఉన్న బలమైన బంధం దాగి ఉంది.

రోహిత్ కొత్త కారు నంబర్ "3015". ఈ నంబర్‌ను చూసిన అభిమానులు దాని వెనుక ఉన్న రహస్యాన్ని ఇట్టే కనిపెట్టారు. ఇందులో '30' అంకె రోహిత్ కుమార్తె సమైరా పుట్టిన తేదీని (డిసెంబర్ 30) సూచిస్తుండగా, '15' అంకె కుమారుడు అహాన్ పుట్టిన తేదీని (నవంబర్ 15) తెలియజేస్తుంది. అంతకంటే ఆసక్తికరమైన విషయం ఏమిటంటే.. ఈ రెండు సంఖ్యలను (30+15) కలిపితే వచ్చే '45', రోహిత్ శర్మ జెర్సీ నంబర్ కావడం విశేషం. తన పాత లంబోర్ఘిని కారుకు కూడా వన్డేల్లో తన అత్యధిక స్కోరు అయిన "264" నంబర్‌ను పెట్టించుకున్న రోహిత్, ఇప్పుడు కూడా అదే సంప్రదాయాన్ని కొనసాగించాడు.

ఇటీవల డ్రీమ్11 పోటీలో గెలిచిన ఒక విజేతకు తన పాత లంబోర్ఘిని కారును రోహిత్ బహుమతిగా ఇచ్చేసిన విష‌యం తెలిసిందే. ఆ తర్వాతే ఈ కొత్త కారును కొనుగోలు చేశాడు. లంబోర్ఘిని ఉరుస్ ఎస్ఈ మోడల్ అయిన ఈ కారు ఎక్స్-షోరూమ్ ధర సుమారు రూ. 4.57 కోట్లు ఉంటుందని అంచనా. ఇది కేవలం 3.4 సెకన్లలోనే 0 నుంచి 100 కిలోమీటర్ల వేగాన్ని అందుకోగలదు.

ఇక క్రికెట్ విషయానికొస్తే, రోహిత్ శర్మ చివరిసారిగా ఐపీఎల్‌లో ముంబై ఇండియన్స్ తరఫున ఆడాడు. ఆగస్టులో బంగ్లాదేశ్‌తో జరగాల్సిన సిరీస్ రద్దు కావడంతో, అక్టోబర్‌లో ఆస్ట్రేలియా పర్యటనతో ఆయన తిరిగి అంతర్జాతీయ వన్డే మ్యాచ్‌లు ఆడనున్నారు. అయితే, ఈ పర్యటన తర్వాత రోహిత్, విరాట్ కోహ్లీల వన్డే భవిష్యత్తుపై ఊహాగానాలు కొనసాగుతున్నాయి.